·
睇完金Ling介紹嘅片，三月尾去咗濟州搵Fairytale wedding影Pre Wedding，化妝師同攝影師都係韓國人，不過全程都有位香港人為我哋翻譯，所以成個過程都好順利。
事前同團隊交代咗我住咩酒店，拍攝當日佢哋朝早8:55就嚟咗酒店接我哋，去佢哋嘅studio化妝同換衫，化妝姐姐非常專業，而且一啲都唔馬虎，裙款都有好多可以揀，今次我揀咗一件白色婚紗同一件黑色禮服，再加一套自備嘅經典白T牛仔褲。
然後就出發去拍攝場地，攝影師一早已經喺嗰度等緊我哋。
我男朋友好少影相，所以喺鏡頭前面笑得好僵硬，而且都唔知點擺pose，不過我哋當日係完全唔使諗要做咩動作，攝影師不斷指導我哋做唔同嘅姿勢，慢慢，我男朋友就笑得自然返，久唔久攝影師都會攞相機嚟俾我哋睇吓成品，估唔到咁尷尬嘅我哋竟然可以影得好自然好靚🤣🤣
我哋今次揀嘅四個場地，分別係花田，草地，街景，同海灘，有12點幾一路影到5點幾，辛苦攝影師，翻譯，同助手全程嘅照顧，佢哋都好敬業，而且令到我哋好自在，總括嚟講係一個好好嘅體驗️唔怪得知而家越嚟越多人鍾意喺韓國影Pre Wedding，性價比絕對比香港高好多🫶
原文出處: 婚享同學會 Wedding Union